Dychwelyd i'r Ysgol, Ôl-COVID

Ym mis Medi bob blwyddyn, mae miloedd o bobl ifanc ledled y wlad yn dychwelyd i'r ysgol. P'un a ydych chi'n mynd i'r Brifysgol, yn cychwyn yn yr Ysgol Uwchradd, neu'n parhau â'ch taith addysg mewn lle hoffus - gall yr adeg hon o'r flwyddyn ddod â llawer o emosiynau i bawb.

Nid yw eleni yn eithriad. Dros yr wythnosau nesaf, bydd pobl ifanc yn trosglwyddo yn ôl i addysg llawn-amser am y tro cyntaf mewn bron i 6 mis. Ar ôl yr hyn a fu’n gyfnod eithriadol o ansicr yn eu bywydau, gallai hyn ddod â rhyddhad i bobl ifanc - o’r diwedd gallant weld rhyw fath o ‘normal’. Ond, am y tro cyntaf eleni, bydd pobl ifanc yn dychwelyd i fersiwn newydd o'r ysgol, math newydd o strwythur a normal newydd mewn bywyd bob dydd.

O ganlyniad i hyn, fe allech chi fod yn teimlo ystod helaeth o emosiynau. Efallai bod rhai yn teimlo'n gyffrous; gall rhai fod yn teimlo'n nerfus neu'n hapus neu'n bryderus; ac efallai bod rhai yn dymuno werthfawrogi eu hamser i ffwrdd ychydig yn fwy!

Yng Nghyngor Ieuenctid Casnewydd, rydym am eich hatgoffa bod gennych hawl i deimlo'r holl emosiynau hyn. Mae'n hollol normal bod yn bryderus neu'n ansicr neu hyd yn oed yn hynod gyffrous am fynd yn ôl i'r ysgol - er gwaethaf yr hyn y gallai rhai o'ch ffrindiau ei ddweud!

Fodd bynnag, yng Nghyngor Ieuenctid Casnewydd, rydym hefyd yn cydnabod y gallai hwn fod yn amser dryslyd. Felly, oherwydd hyn, mae ein Tîm Cyfathrebu wedi datblygu ‘10 o Awgrymiadau Da’ ar gyfer dychwelyd i’r ysgol!

1.     Yn y dyddiau sy'n arwain at ddychwelyd i'r ysgol, ceisiwch ddatblygu patrwm cysgu rheolaidd. Bydd hyn yn gwneud deffro'n gynnar i'r ysgol (rhywbeth nad yw llawer ohonom wedi arfer ag ef bellach) yn llawer haws ac yn gwneud dechrau eich diwrnod yn fwy cadarnhaol!

2.     Paciwch a gwiriwch eich bag ysgol y noson gynt. Fel hyn, byddwch yn dawel eich meddwl bod gennych bopeth sydd ei angen arnoch i wynebu'r diwrnod ac ni fyddwch ar frys i drefnu ar eich bore cyntaf yn ôl yn yr ysgol.

3.     Bwytewch frecwast! Gall hyn ymddangos yn syml ac yn ddibwys, fodd bynnag, trwy gael brecwast, byddwch chi'n teimlo'n fwy egniol ac yn barod i fynd ar y diwrnod o'ch blaen.

4.     Dewch â photel ddŵr y gellir ei hailddefnyddio. Nid yn unig y mae hyn yn well i'r amgylchedd na photel blastig un defnydd, mae aros yn hydradol yn allweddol a bydd yn eich helpu i deimlo'n dda trwy gydol y dydd.

5.     Cymerwch fyrbryd iach. Bydd hyn yn eich helpu i deimlo’n egniol trwy'r dydd ond, ceisiwch wrthsefyll ei fwyta yn ystod gwersi!

6.     Byddwch mor gwrtais a chyfeillgar â'ch athrawon newydd ag y byddech chi i'ch rhai adnabyddus.

7.     Os ydych chi'n cychwyn ysgol newydd, peidiwch â bod ofn gofyn am help! Mae hi bob amser yn iawn gofyn am help pan fydd ei angen arnoch - nid chi yw'r unig un sy'n profi newid.

8.     Arhoswch yn bositif! Gall y diwrnod cyntaf yn ôl fod yn her, fodd bynnag, ceisiwch aros mor gadarnhaol ag y gallwch a chymryd un diwrnod ar y tro.

9.     Gofynnwch i'ch ffrindiau sut maen nhw'n teimlo am fynd yn ôl i'r ysgol. Mae hwn yn amser heriol i bawb a gall siarad am sut rydych chi'n teimlo eich helpu chi a'r rhai o'ch cwmpas.

10. Gwiriwch y cyngor gan eich ysgol y noson cyn i chi ddechrau. Mae gwybodaeth yn cael ei diweddaru'n gyson yn ystod yr amser rhyfedd hwn ac efallai y bydd pob ysgol ychydig yn wahanol, felly, gwiriwch y cyngor gan eich ysgol eich hun i sicrhau eich bod chi'n teimlo'n barod ac yn gyffyrddus i wynebu'r amgylchedd newydd.

O bob un ohonom yng Nghyngor Ieuenctid Casnewydd, pob lwc gyda dechrau'r flwyddyn academaidd newydd! Efallai bod y normal newydd hwn yn ymddangos yn frawychus ond, cofiwch fod pawb yn mynd trwy newid ac mae'n iawn peidio â theimlo'n hollol gyffyrddus. Rydyn ni i gyd yn profi hyn gyda'n gilydd!